ufjelg » Hendingar

Ein fugl på taket…

hvrd — Fri, 22 May 2009 20:52:51 +0000

Sesongens første tjeld er komen til verda på taket ein stad på Universitetet i Bergen og med moderne teknologi kan vi følgje dagleglivet direkte.

Dersom dette gav meirsmak, så dukka også havørna opp på webkamera idag.

Fullemann tatt i undikken

hvrd — Sat, 24 Jan 2009 08:03:45 +0000

Eg føler det er mi plikt å dele denne vesle godbiten med dykk. Saksa frå BA. Stikkord:

lystig herre
skrålte
bekledningshemmet
ute av normal posisjon

The Micropops live

hvrd — Wed, 24 Sep 2008 07:35:07 +0000

The Micropops med Håkon Njøten er headliner under helgas Dugnad-festival der inntektene går til bandsa som mista utstyret sitt under brannen i Skuteviksbodene. Andre bands som stiller opp er: Datarock, The Whitest Boy Alive og Kim Hiorthøy.

Ref. opplett.no.

Hey hey, my my

hvrd — Sun, 10 Aug 2008 22:57:16 +0000

Konsertar med Neil Young nærmar seg. Nokon heldige skal avgarde for å sjå han allereie i morgon, medan andre må vente heilt til den 26. Her er ein smakebit.

Tambarskjelvar – Anga 4-4

hvrd — Sat, 03 May 2008 06:42:21 +0000

1. mai spelte Tambarskjelvar sitt nyoppstarta A-lag treningskamp mot den gamle kjempen Anga. Resultatet enda 4-4 og Ufjelgs sportsredaksjon gratulerer Tambar-gutane med sin første kamp etter nyoppstartinga utan tap. Referat frå kampen på Tambar.no.

Første seriekamp er mot Gaular 2 den 6. mai på Naustdal stadion. Møt opp!

Kulturnytt frå nord

Proletaren — Sat, 08 Mar 2008 14:23:32 +0000

Her er noko av det som skjer på kulturfronten her i Hammerfest i helga. Dette blir nok stygt.

Storfint på Borealis

hvrd — Mon, 07 Jan 2008 18:43:55 +0000

Deler av programmet til samtidsmusikkfestivalen Borealis er på plass og det er klart at sjølvsaste Mike Patton (tidl. Faith No More) skal opptre saman med trekkspel-, gitar-, banjo- og fløytevirtuosen Stian Carstensen (feks. Farmers Market, Banjovi). Framsyninga er på Landmark tysdag 26. februar.

Den siste KNAXianar

Proletaren — Wed, 12 Dec 2007 17:11:54 +0000

Denne veka er det slutten for KNAX i Sparebanken Sogn og Fjordane. Har du sparebøsse eller merkehefte må du straks springe til næraste filial, elles går kronestykkene dine frå barndomen med i Terra-dragsuget. Dette barnekonseptet har vore der sidan eg var liten, men heretter vert det altså Kongleriket. Mange fine metaforar for sparing i floraen, ja. Dette blir nok pop.

Eit kjapt søk på google viser at dette ikkje er noko Sparebanken Sogn og Fjordane har sugd av eige bryst. Dei har dette i mange land! Fasaden slår sprekker og tilliten til banken er for min del sterkt svekt.

Verdas beste band står på scena i kveld

hvrd — Mon, 10 Dec 2007 17:46:11 +0000

Etter at dei la opp i 1980 har ikkje Led Zeppelin spelt meir enn eit par (omlag 2) konsertar. I kveld spelar dei ein konsert til minne om tidlegare direktør i Atlantic Records, Ahmet Ertegün. Interessa før denne konserten har vore enorm og no går rykta om ein turné til neste år. Frank Nes, du veit kva du har å gjere.

Evig solskin i eit sjukdomfritt sinn

Proletaren — Wed, 21 Nov 2007 18:33:44 +0000

I dag fekk me nyhenda om at det no har vore eit gjennombrot i stamcelleforsking. Forskarar i USA og Japan har klart å lage stamceller av hudceller, slik at ein ikkje treng nytte befrukta egg. Dette er jo vel og bra, men i nyhendeinnslaget som eg høyrde i radioen og seinare på Dagsrevyen klokka 19 vart det sagt at målet i framtida er eit liv utan sjukdom og evig liv. Er dette ein del av Den Norske Lægeforening sin uttalte visjon/filosofi? Eller er det ei utsegn frå NRK for å sexe opp innslaget? Dersom det fyrstnemde er riktig vonar eg at det vil kome ein debatt om etikken til Lægeforeningen. At ei yrkesgruppe som lever av å hjelpe/reparere sjuke kroppar/menneske sitt mål er å utrydde all sjukdom og dermed sitt levebrød er jo heilt idiotisk. Tenk om kokkar skulle forske på eit middel for gjer at folk ikkje trengde å ete? Er det bra å fjerne all sjukdom? Er det mogleg? Kva med psykiske sjukdomar. Kva samfunn vert det? Evig liv til alle mann? I desse klimatider må slike påstander vere reine drepen for miljøet. Evig liv? Kvar då? På Mars?

Eg vel å tru at denne påstanden kjem frå NRK, og vonar at dei i framtida kuttar ut denne typen tabloide fjolleutsegn. Er det nokon lesarar frå helsevesenet som vil stille seg bak dette?

La oss ta fyrstesideoppslaget!

Proletaren — Sat, 03 Nov 2007 10:21:34 +0000

Har de sett den nye videoen til Spice Girls? Ai ai ai. Nittitalets fjortisheltar er attende. Tobarnsmor Victoria og gjengen ålar seg lettkledd rundt i eit mørkt og tungt møblert rom. Ein slags cross-over av drapsåstad frå The Linley Mysteries og ein pornofilm. Det sjukt, men samtidig må eg berre le. Moralen er i fritt fall. Men dei kjem vel unna med dette også. Billettane til "konsert-turnéen" er visst rivne vekk. Undrast på kven kjøparane er? Nye fjortisar eller gamle grisar? Dette appelerer visst til fleire lag.

Prisar skulen

Proletaren — Sun, 28 Oct 2007 12:53:28 +0000

Det for ein del ufjelglesarar ikkje heilt ukjende bandet Ungdomskulen stakk i går av med RiksAlarmprisen under Alarmpris-utdelinga på Sentrum Scene i Oslo. I prisen inngår turné i Noreg, øvingsfasilitetar før turnéen og showcase på By:Larm i Oslo. Prisen er eit samarbeid mellom Alarmprisen og Rikskonsertane og vinnaren vert plukka ut av ein fagjury.

Eg vil gratulere dei så mykje med prisen, og vonar no at dei kanskje legg Hammerfest inn i turnéplanen. Ungdomskulen er for tida på turné i USA og Storbritania.

Songfuglar og fengselsfuglar

baardemann — Wed, 12 Sep 2007 08:49:41 +0000

I reality-floraen er det mykje ugras, og sjølv om sjangeren er relativt ung, er det resirkulasjon mykje meir enn nyskaping som har prega dei nye seriane, som til dømes Den rette for Tor og den heilt unødvendige Sangstjerner. TvNorge sin seinaste satsing klarer heller ikkje heilt å frigjere seg frå velbrukte oppskrifter, men den har likevel mykje for seg.

Fengselskoret er vel like mykje eit program om folk som er langt nede og som leitar etter utvegar i meir enn fysisk forstand, enn ein songkonkurranse eller realityserie. Det er som fengselsdokumentar denne serien er mest interessant, og serieskaparane har klokleg nytta det unike høvet til å få fangar til å tenkje høgt om tilveret, framfor å blir eit slags Idol i fengselet.

I reality-forstand syner serien fram ein gjeng med meir eller mindre hardbarka mannfolk i Oslo fengsel som skal få trening i å synge, og i slutten av ein periode på ti veker opptre som eit kor framfor resten av fangane.

På pluss-sida må vel og nemnast stabil filming, og at songpedagogen liknar på Katrine F.

Fengselskoret kan du sjå på TvNorge søndagar klokka 21.30.

Grundig research

baardemann — Thu, 06 Sep 2007 06:07:45 +0000

Den polske krimforfattaren Krystian Bala kan ha gått litt for langt i førebuingane til ein av romanane sine. Politien hadde ingen spor i etterforskinga av drapet på foretningsmannen Dariusz Janiszewski før dei vart tipsa om romanen Amok frå 2003. Der fekk dei lese detaljerte skildringar av ugjerninga. Bala er no dømd til 25 år i fengsel, og får altså svært god tid til å skrive romanar med handling frå fengselsmiljøet.

http://www.abcnyheter.no/node/51733

Ja, vi elsker

hvrd — Thu, 17 May 2007 10:36:47 +0000

.... norwegian country music går i år av stabelen på Logen teater. Arrangementet startar kl 16.00 og held på til langt på natt. Tek du turen får du høve til å høyre blant anna Gram Per Person spele country ~~cover-låtar av sin store helt~~, One way out synge smektande gospeltonar, Tom Sawyer & The Huckleberry Finns og bluegrass, Mao med sin country & eastern og det relativt ferske countryensemblet Empty bottles, broken hearts. Felles for halvparten av kveldens bend, forutan den åpenbare sjangerlikskapen, er at Jørgen "The boy can play" Sandvik spelar i dei.