ufjelg

Etter ein fantastisk sommarferie er det på nytt kvardagen som rår. Den held stort sett eit høgt nivå, krydra med enkelte høgdepunkt. Å verte oppringt av ein telefonselgar representerar definitivt eit slikt høgdepunkt. Etter at eg starta med min strategi å aldri avslutte ein samtale med ein telefonselgar har det dessverre vorte stadig sjeldnare at dei ringer. Men her ein dag måtte eg ta telefonen for mi kone (!) då ho var travelt oppteken med å køyre bil. Til mi store glede var det Krisfoffer frå Norsk Helsekost AS som ringte. Samtalen gjekk omtrent som følger:

- Hei, det er Krisfoffer fra Norsk Helsekost AS som ringer. Bor du fremdeles i Wilsengate?
- Nei, eg bur i Wilsesgate. Kvifor lurer du på det?
- Jo, vi vil gjerne sende deg noen produktprøver på selolje og rosenrot. Gratis, selvsagt.
- Det var generøst, men kva skal eg med dette?
- Jo, dette er preparat som har vært brukt i tradisjonell norsk medisin i hundrevis av år. Selolje har vist å gi effektiv beskyttelse mot hjerte/kar sykdommer.
- Interessant. Korleis veit du det?
- Det er vitenskapelig dokumentert, forklarar Kristoffer sjølvsikkert, men eg er framleis skeptisk.
- Kan du gje meg nokre referansar? Kva tidsskrift er dette publisert i? Kva design hadde studia dykkar?
- Ehhh, dette vet jeg faktisk ikke helt i detalj. Men det er heller ikke så viktig, for jeg vet at det virker. Det er nøye dokumentert og i tillegg bruker jeg selolje selv. Så jeg har kjent på kroppen at det virker.
- Kor gamal er du Kristoffer?
- Jeg er 22 år.
- Trur du det er vanleg at folk i 20-åra får hjarte/kar sjukdomar?
- Ehh, nei det er kanskje ikke så vanlig.
- Kor mange norske 22-åringar trur du får slike sjukdomar kvart år?
- Det vet jeg ikke. Kanskje 10-15?
- Det er kanskje ikkje så dumt tippa. Og du meiner at din bruk av selolje har redda deg frå å verte ein av desse?
- Det mener jeg bestemt. Selolje har i tillegg ingen bivirkninger. Vårt produkt kommer i kapsler. Du vil få tilsendt gratis vareprøve, og om du ikke ønsker å fortsette å få tilsendt vårt produkt er det bare å avbestille det skriflig, forteller Kristoffer ivrig.

Eg må avbryte han med eit lite kontrollspørsmål.

- Veit du kva ein hjarte/karsjukdom er?
- Ehhhhh. Vel. Altså... Nei, det vet jeg faktisk ikke...
- Korleis kan du då vite at du ikkje har fått ein slik sjukdom?
- Det vet jeg helt sikkert, for det har fastlegen min fortalt meg.

Det er berre å håpe at denne geniale fastlegen har ledig kapasitet på si liste. Kristoffer byrja eg imidlertid å verte uroa for. Det kunne verke som om han hadde såpass store hol i sine allmennkunnskapar at ikkje all selolje i heile verda ville vere nok til å tette dei. Eg bestemte meg for å hjelpe han.

- Trur du hjarte/kar sjukdomar kan ha noko med hjartet å gjere?
- Det høres logisk ut.
- Veit du kva funksjon hjartet har?
- Det pumper blod rundt i kroppen, svarar han raskt. Han virkar å vere sikker i si sak og eg kan nesten spore ein stolthet i stemma.
- Riktig, riktig. Korleis trur du seloljen virkar?
- Jeg tror nok seloljen vil få hjertet til å pumpe hardere.
- Neppe. Trur du ikkje heller seloljen kan hjelpe til med å smøre hjartet slik at det kan pumpe utan friksjon?
- Jo, når du sier det tror jeg at det faktisk kan stemme.
- Vel, det stemmer ikkje, svarar eg krasst og knuser hans håp om å innkassere nok eit riktig svar. Deretter følger eg opp med ein lang monolog der eg forklarar det moralsk forkastelege med å selge eit produkt ein ikkje veit korleis virkar. Ekstra ille er det når produktet i beste fall er utan verknad. Kundane han kan håpe takkar ja vil overhodet ikkje ha nokon nytte av det, og den typiske kunden som takkar ja er gjerne ikkje av dei som har råd til å sløse bort pengar på meinigslaus helsekost. Synast han det er greit å tene pengar på denne måten?

- Ja, det synest jeg er helt uproblematisk. Selolje er brukt i mange hundre år, og selv om du ikke har tro på det, så er det mange som vet at det virker. Men jeg får inntrykk av at du ikke er så interessert, så kanskje vi skal sette strek for denne samtalen?
- Eg føler at vi kanskje ikkje kjem noko lengre når det gjeld selolje, men eg er spent på å få høyre om ditt andre produkt. Kva er det rosenrot skal hjelpe mot, spør eg oppriktig interessert.

Kristoffer verkar å vere litt overraska over denne interessa, men når han får summa seg litt får han satt på autopiloten og startar å fortelle kor fantastisk rosenrot er. Faktisk virkar det for (og mot!) det aller meste. Akkurat når eg skal stille eit par kritiske spørsmål pirkar mi kone meg på skuldra og ønskjer svar på eit køyreteknisk spørsmål. Eg ber Kristoffer holde linja, men då eg tar opp igjen telefonen etter nokre minutt har han lagt på.

Eg håper han (eller ein av hans mange kolleger!) ringer attende med det aller første!